Með eggjunum bar ég fram Parmaskinku með rocketsalati og cantaloupe melónu ásamt ólífum.  Með góðu brauði getur orðið úr þessu máltíð.

Að því að mér skilst teljast fyllt egg vera álíka gamaldags réttur og rækjukokteill en þau áttu víst miklum vinsældum að fagna um miðjan sjöunda áratuginn. Sökum aldurs get ég ómögulega staðfest þessa sögusögn og veit því ekki hvort þessar vinsældir voru bundnar við útlönd eða hvort þessi auðveldi og alþýðlegi réttur átti uppá pallborðið hjá Íslendingum á sama tíma. Sömu heimildir herma að fyllt egg séu aftur að koma inn, burtséð frá því, þá hafa mér alltaf þótt þau mjög góð og gott að grípa í þetta þegar óvænta gesti ber að garði og maður á nánast ekkert í ísskápnum.......nema egg ! Sómir sér vel sem lystauki á undan mat, með öðrum pinnamat í veislu eða sem léttur hádegisverður með góðu brauði og einföldu salati.

Fyllt egg

Innihald:
12 stór egg, harðsoðin
1/2 bolli léttmajones
2 tsk Dijon sinnep
cayenne pipar á hnífsoddi
Reyktur lax eða silungur
Vorlaukur til skrauts
Kapers

matreiðsluleiðbeiningar:
Skerið eggin í tvennt og fjarlægið rauðuna innan úr þeim. Stappið eggjarauðurnar létt með gafli áður en að majonesinu, sinnepinu og piparnum er blandað saman við. Sprautið í hvíturnar aftur eða fyllið þær með skeið. Skerið laxinn í litlar sneiðar og raðið fallega ofan á rauðurnar. Skreytið með vorlauk og kapers.

Tengt efni:
• Kjúklingasalat með melónu og valhnetum
• Lax- og kartöfluquiche
• Lystaukar
• Samlokur m. beikon og egg salati
• Skírnarveisla