Diskar á 3 hæðum spara pláss á hlaðborðinu

Gott að hafa diska á 2 borðshornum svo hægt sé að ganga beggja vegna þegar fólk fær sér af hlaðborðinu

Nokkur lítil föt koma betur út en eitt stórt

Hægt er að skapa mismunandi hæð á borðið með fleiru en blómaskreytingum, hér eru það brauðstangir sem lyfta borðinu upp

Diskar og skálar á fæti inn á milli venjulegra diska gera borðið mun fallegra og girnilegra á að líta

Ef pláss er fyrir hendi er bæði fallegt og hagkvæmt að hafa sér desert eða kökuhlaðborð
 

• Það er að mörgu að hyggja þegar fermingarundirbúningurinn er annars vegar og ekki síst þegar fólk ætlar að sjá um veitingarnar sjálft. Hér er smá samantekt sem auðvelda ætti fólki að skipuleggja sig komast í gegnum daginn með glans. Auðvitað eiga sömu reglur við aðrar veislur  sem fólk ætlar að sjá um sjálft, hvort sem það er brúðkaup, afmæli eða eitthvað annað tilefni.

• Númer eitt, tvö og þrjú er hreinlæti. Viðkvæm matvæli þurfa að vera soðin í gegn og gæta þarf sérstaks hreinlætis við matargerðina. Athugið að ef of mikið að heitum mat er sett í kæli í einu lækkar þar með hitastig ísskápsins það mikið að fyllsta öryggis er ekki lengur gætt. Aftur á móti er ekki gott að láta mat kólna hægt niður heldur.
   

• Það þarf að skipleggja sig vel og fram í tímann. Gott er að velja með öðru uppskriftir sem auðvelt er að frysta og geyma svo ekki þurfi að útbúa allt frá grunni á deginum stóra. Ekki vera heldur með of marga rétti. Sumt er einnig hægt að gera deginum áður eins og t.d. að skera niður grænmeti, útbúa grunn í sósuna og jafnvel klára hana alveg þannig að bara eigi eftir að smakka hana til. Einnig er tilvalið að velja tímasetninguna þannig að þið hafið ágætan tíma til undirbúnings á fermingardaginn sjálfan. Jafnvel þó að barnið eigi að fermast fyrir hádegi að hafa veisluna ekki fyrr en t.d. 5 eða 6. Ekkert sem mælir á móti því.
   

• Það liggur í augum uppi að þegar allur ykkar tími og orka fer í að hugsa um matinn er mikilvægt að vera búin að öllu öðru vel fyrir áætlaðan tíma. Huga þarf að skreytingum, drykkjum og öðru slíku sem ekki þarf að hafa áhyggjur af að renni út á tíma eða skemmist.
   

• Verið búin að sanka að ykkur stórum plastílátum með loki undir tilbúinn mat og annað sem hægt væri að undirbúa fyrirfram eins og saxað grænmeti eða slíkt. Það er einhvern veginn aldrei til nóg af svoleiðis ílátum og mun auðveldara að vera búin að koma sér upp nægum birgðum í stað þess að þurfa hugsanlega að nota margar litlar skálar.
   

• Hafið þó í huga að þegar kemur að því að bera þessi matvæli fram er oft fallegra að nota mörg lítil föt í stað þess að hrúga öllu á eitt stórt. Þegar svona margir gestir ganga um mat eins og á hlaðborði, er glansinn oft fljótur að fara af  uppstillingunni og verður frágangurinn oft á tíðum hálf sóðalegur. Því er gott að skipta bara fötunum oft út.
   

• Þegar uppskriftir eru margfaldaðar þarf ekki alltaf að margafalda öll innihaldsefnin. Dæmi um þetta er t.d. feiti til steikingar, það er nóg að hún þeki botninn á viðkomandi pönnu, annars verður allt fljótandi í feiti. Eldunartími er heldur ekki eitthvað sem hægt er að margafalda á við uppskriftina, hann getur annað hvort orðið heldur lengri eða mun styttri. Ég mæli með kjöthitamæli undir þessum kringumstæðum og annað verður hreinlega að smakka til. Stærð ílátanna sem eldað er uppúr getur skipt miklu um eldunartímann.

• Fáið hjálp hjá ættingjum og vinum, flestir myndu glaðir leggja sitt af mörkum, ef ekki við undirbúning þá við frágang og serveringu. Ekki gleyma að manna eldhúsið svo þið getið sinnt gestunum.
   

• Hvað þarf mikið af hverju ? Fyrir marga er þetta einn erfiðasti þáttur skipulagning- arinnar. Þú vilt vera viss um að hafa nóg en þú vilt heldur ekki sitja uppi með of mikið af afgöngum. Það er margt sem spilar inn í þetta reikningsdæmi eins og t.d. lengd veislu, tegund matarins boðið er uppá, samsetning matseðilsins, hlutfall barna og fullorðinna gesta og að lokum fjöldi rétta á hlaðborðinu.
   

• Ef ákveðið er að halda kaffiveislu verður hver að þekkja sitt heimafólk; hvort fer meira af kökum eða brauðmeti almennt í veislum í fjölskyldunni ? Annars skal þetta haft til hliðsjónar: 3 tertusneiðar, 2-3 snittur, 1 skammtur af heitum eða köldum brauðrétti og 2-3 stk af konfekti, kransaköku eða smákökum á mann.
   

• Hér er gróf tafla sem hægt er að hafa til hliðsjónar við að áætla magnið en venjulegast er miðað við 5-600 gr í heildarneyslu á hvern fullorðinn einstakling. Skoðið samsetningu rétta útfrá þeirri tölu.

  Tegund	magn pr. mann
  Drykkir	375-400ml
  Kjöt á beini	200-300 gr
  Úrbeinað kjöt	125-175 gr
  Kjöt í pottrétti	100-125 gr
  Fiskur í fiskrétti	100-150 gr
  Kartöflur	150-175 gr
  Grænmeti soðið	100-125 gr
  Salat ferskt	100-150 gr
  Hrísgrjón, ósoðin	1/2 - 1 dl
  Súpa	2 dl
  Eftirréttir	2 dl