Smjörpappírinn kemur smart út sem muffinsform.

Þegar verið er að baka Muffins getur það stundum orðið svolítið sóðaleg iðja að koma deginu í formin með tveimur skeiðum eins og algengast er og maður endar með borðið og bökunarplötuna alla í deigslettum, sérstaklega ef degið er mjög þunnt. Svo fer líka mismikið af degi í hvert form og kökurnar verða æri misjafnar og misbakaðar. Það er því þjóðráð að nota ísskeið sem ætluð er til þess að kúla ís, til þess að koma hæfilegum skammti af degi í hvert form og það án alls subbuskapar. Kaupið íssköfu sem virkar þannig að þegar handfanginu er þrýst saman losar hún ískúluna sjálfkrafa úr skeiðinni. Einfalt en flýtir mikið fyrir og gerir vinnuna einfaldari.

 Þegar ég baka Muffins, hvort sem það er sætt eða ósætt eins og skonsur, nota ég alltaf Muffinspönnur, (ágætar slíkar með teflonhúð fást t.d. í IKEA), þá þarf maður ekki að nota pappírsform ef maður smyr formið vel og kökurnar koma allar jafnar og fallegar úr ofninum. Hinsvegar er gaman að nota form annað slagið, sérstaklega í barnafmælum, og velja þá form eftir þema tilefnisins. En formin getur maður líka útbúið sjálfur með góðum árangri, ef maður er að leita eftir einhverju svolítið öðruvísi og smart. Klippið bökunarpappír niður í ferninga og þrýstið hverjum ferningi yfir glas til þess að móta pappírinn áður en að honum er stungið í Muffinspönnuna.