|
Góður nætursvefn er undirstaða vellíðunar almennt eins og allir
vita og ekki úr vegi að dekra aðeins við sig þegar kemur að
rúmum, rúmfatnaði og sængum. Við eyðum jú um 1/3 ævinnar í
rúminu. Kaupið það besta sem þið hafið efni á þá stundina, það
ætti að borga sig þegar fram í sækir, fyrir utan þá
vellíðunartilfinningu sem það veitir nótt eftir nótt. Eitt það
besta sem ég veit er að skríða upp í rúm með nýstraujuðum
rúmfötum og nýviðruðum sængurfötum. Lúxus sem maður ætti að
veita sér sem oftast og kostar ekki krónu ! Það er margt sem
þarf að hafa í huga þegar maður velur sér rúmfatnað, sérstaklega
ef ætlunin er að kaupa eitthvað sem á að endast. Til að
sniðganga allar tískusveiflur en samt hafa eitthvað smart
á rúminu er sniðugt að kaupa hvít eða mjög ljós rúmföt og þá er
hægt að bæta við auka koddaverum og jafnvel lökum í þeim
tískulitum og mynstrum sem gilda hverju sinni og nota þau með.
En bómull er ekki það sama og bómull og til þess að eiga
möguleika á að skilja á milli gæðaefnis og þess ódýra skulið þið
leita eftir því hversu hátt "thread count" er í efninu. Þetta
þýðir einfaldlega að þræðirnir í hverjum fersentimetra eru
taldir og því fleiri þræðir sem er pr. fersentimetra
efnis, því slitsterkara og mýkra er það. Oftast eru notaðar
enskar mælieiningar; þræðir pr. Inch eru taldir frekar en
sentimetrarnir en hafið í huga að allt yfir 200 pr. inch er
talið gott. Því hærra, því betra hvað þetta varðar. Ef
umbúðirnar segja svo til um að þetta sé "combed cotton" er það
ávísun á mýkt.
meðhöndlun:
- Ávallt skal þvo rúmfatnað áður en hann er notaður í
fyrsta skipti, til að ná steiningunni úr. Í sumum tilfellum
þarf að þvo rúmfatnaðinn í fyrsta skipti yfir ákveðnu
hitastigi til þess að festa litinn en þetta á þá bara við um
sterka liti. Skoðið vel umbúðirnar áður en þið þvoið ný
rúmföt og fylgið leiðbeiningunum.
- Forðist að nota klór þar sem hann veikir þræðina í
efninu og eykur slit.
- Gott er að nota fljótandi þvottaefni á dökkan rúmfatnað
þar sem duftið á það til a
- Það á helst ekki að þvo rúmföt með handklæðum þar sem
handklæðin auka líkur á að rúmfötin hnökri.
- Það er léttara að strauja ef rúmfötunum er stungið í
þurrkarann nokkra stund og svo tekin beint út og straujuð
áður en þau þorna til fulls.
- Útsaumur og blúnda skal ávallt straujað á röngunni með
tvíbrotið handklæði undir, það kemur í veg fyrir að
útsaumurinn klessist niður.
Hér ætla ég að fara aðeins yfir mismunandi tegundir
rúmfatnaðar.
bómull: Mjúk bómullin er hefðbundið efni í sængurföt,
vill krumpast mikið en andar vel. Til í mismunandi vefnaði, allt
frá sléttofinni bómull yfir í bómullarsatín og damask sem er
dýrara.
bómullar og pólýesterblanda: Kosturinn við þessa
blöndu er að hún krumpast ekki eins og hrein bómull en hún er
ekki eins mjúk viðkomu. Á móti kemur að þetta efni andar ekki og
á það til að hnökra leiðinlega.
jersey: Þetta er prjónað bómullarefni og það sama og
notað er í T-Boli. Kosturinn við það er mýktin og það krumpast
ekki en á það til að aflagast og verða skrýtið í laginu. Einnig
vilja ódýrari gerðir jersey efnisins hnökra.
flannel: Þetta bómullarefni hefur ekki mikið verið
notað í rúmföt hérlendis nema þá helst fyrir ungabörn en það er
mjög hlýtt. Gallinn við flannelið er að það á það til að hlaupa
mikið, leitið af "pre-shrunk" rúmfötum en það þýðir að búið sé
að þvo þau og taka í reikninginn hversu mikið efnið hleypur.
lín: Slitsterkt með afbrigðum en dýrt. Ef þið
fjárfestið í líni ætti það að duga fyrir komandi kynslóð.
Gallinn er sá að það þarf ávallt að strauja það og einnig getur
það verið hart viðkomu meðan það nýtt en það mýkist með aukinni
notkun.
silki: Dýrt efni sem hentar vel í rúmföt vegna
einangrunareiginleika sinna. Er gott hvort sem er í miklum kulda
eða miklum hita. Stór mínus er hinsvegar að flest rúmföt úr
silki þurfa þurrhreinsun.
|
