Hafa verður í huga að leyfa fermingarbarninu að vera með í ráðum á sem flestum sviðum

• Byrja á að bóka sal um leið og þið vitið dagsetninguna ef ekki er ætlunin að halda veisluna heima. Athugið hvað felst í salarleigunni og verðið ykkur út um það sem uppá vantar. Þetta geta verið dúkar, vasar, kertastjakar, kaffikönnur og þess háttar.
   
• Ákveðið í samráði við fermingarbarnið, hverskonar veislu skal halda. Tími veislunnar getur verið leiðbeinandi um tegund matar sem boðið skal uppá. T.d. brunch í hádeginu með léttum réttum og súpu, kaffiveisla um miðjan dag o.s.fr.v.
   
• Setjið saman gestalista og gætið þess einnig hér að hafa fermingarbarnið með í ráðum.
   
• Verið snemma í því að athuga með fatnað. Sumir vilja leigja fötin en aðrir að kaupa þau en það borgar sig alltaf að vera snemma í því. Þá er líka meiri tími í að spá í það sem ekki er hægt að gera með sama fyrirvara. Ekki gleyma skóm og öðrum aukahlutum.
   
• Pantið myndatöku og í tilfelli stelpnanna bókið prufugreiðslu á sama degi svo hægt sé að samræma þetta tvennt.
   
• Athugið hvort að í fjölskyldunni eða vinahóp fermingarbarnsins leynist listamaður sem getur troðið upp með lítið skemmtiatriði af einhverjum toga. Einnig gæti verið gaman að einhver sem vel þekki til tæki að sér að kynna viðstadda og fara snöggt yfir fjölskyldutengslin.
   
• Pantið fermingartertu eða kransaköku ef hún á að vera aðkeypt.
   
• Útbúið eða látið útbúa boðskortin, skemmtilegt er að láta fermingarbarnið sjálft skrifa undir þau eða jafnvel handskrifa þau ef fjöldinn er ekki því meiri.
   
• Ef ættingjar eru að koma langt að er gott að hafa samband við þá og athuga hvort þeir hafi orðið sér úti um gistingu hjá ættingjum eða vinum og bjóða fram aðstoð sína.
   
• Kaupið eða búið til gestabók.
   
• Um leið og þið hafið gestalistann nokkurn veginn á hreinu er hægt að fara að kaupa inn drykki og annað sem þolir geymslu. Nýtið ykkur sértilboð verslana þegar þau gefast.
   
• Fáið að skoða salinn og ákveðið uppröðun á honum eða stofunni ykkar ef ætlunin er að fá gestina heim. Í framhaldi af því er síðan hægt að ákveða hvaða skreytingar eigi að nota og hvað þurfi að kaupa / panta af blómum, skreytiefni og öðru slíku.
   
• Pantið fermingarkertið ef það á að vera áletrað og notið tækifærið og pantið einnig prentun á servíettur.

Ef þið ætlið svo sjálf að sjá um veitingarnar er gott að skoða greinina hér að neðan sem titluð er “matur fyrir marga”

tengt efni:

• matur fyrir marga
• fermingarhlaðborð skreytt