Ég kaus að láta ljósmyndarann fylgja okkur hvert skref allan daginn og urðu til ákaflega fallegar myndir af "momentum" sem venjulega eru ekki tengdar myndatökum eins og t.d. baðferðin fyrir athöfnina

Blandið saman formlegum uppstilltum tökum og öðrum sem eru meira "spontant"

Það þarf ekki alltaf að sjást í andlit til þess að myndin virki vel !

Hér er manneskjan í aukahlutverki en umhverfið látið njóta sín

Stemmningsmynd sem sýnir andrúmsloftið fyrir athöfn

• Gerðu þér í hugarlund hvernig stíl þú vilt hafa á myndunum. Ef þú sérð eitthvað sem þér líkar í blaði er um að gera að geyma myndina og taka svo með sér bunka af svoleiðis sýnishornum þegar að þið hittið ljósmyndarann svo hann eigi auðveldara með að gera sér grein fyrir því hvað það er sem þið eruð að sækjast eftir.
   
• Þegar þið hittið ljósmyndarann fyrir athöfnina skuluð þið biðja hann um að fá að sjá myndatöku úr einu brúðkaupi eins og það leggur sig en ekki bara svokallað "best of" til þess að þið getið betur gert ykkur grein fyrir stíl og hæfni ljósmyndarans.
   
• Segið ljósmyndaranum fyrirfram hvort þið viljið svart-hvítar tökur eingöngu, blandað í lit eða öfugt. Einnig er gott að taka fram hvaða skot þið viljið umfram allt hafa í lit og hvað þarf að vera svart-hvítt.
   
• Útbúið lista með þeim tökum sem þið viljið alls ekki að vanti s.s. hópmyndir, myndir af brúði og föður hennar, þegar hjónin skera kökuna, við kirkjutröppurnar, rétt áður en að farið er inn kirkjugólfið, brúðarmeyjar/sveinar og svo framvegis. Það vill oft gleymast að taka jafnsjálfsagðar myndir í amstri dagsins og þó að þið hafið ekki ráðið ljósmyndara til að fylgja ykkur allan daginn er sjálfsagt að koma einhverjum vini eða fjölskyldumeðlim í þetta verkefni. Verið jafn nákvæm við þennan aðila eins og þið væruð að ráða ljósmyndara; munið að þetta verður ekki endurtekið ef að það er eitthvað sem ykkur finnst vanta.
   
• Ekki vanmeta þau ljósmyndafæri sem skapast bæði fyrir og eftir athöfn og veislu. Biddu ljósmyndarann að vera vakandi yfir óvenjulegum sjónarhornum.
   
• Gerið ykkur ferð bæði í kirkjuna, veislustaðinn og aðra staði sem þið teljið að komi til greina sem myndatökustaður. Reynið að gera ykkur í hugarlund hvernig myndir þið mynduð vilja fá á hverjum stað fyrir sig.
   
• Þegar þið skoðið sýnishorn hjá ljósmyndara verðið þið að gera það upp við ykkur hvort viðkomandi ljósmyndari henti ykkur, hvernig ykkur líður í návist hans og hvort myndirnar hans endurspegli ykkar persónulega stíl.
   
• Þegar þið bókið ljósmyndara sem hafa þegar skapað sér nafn og sérstöðu eruð þið ekki að taka neina sénsa; myndarnar verða örugglega góðar en á móti kemur að þeir eru oft fastari í sínum stíl og erfiðara að fá myndir sem eru alveg einstakar og í ykkar stíl. Reynið að forðast endurtekningu.
   
• Fáið á hreint hvað sé innifalið í tilboðinu. það getur verið eins og að bera saman epli og appelsínur að bera saman tilboð hinna ýmsu ljósmyndara, svo mismunandi geta þau verið hvað varðar innihald og fylgihluti. Stækkanir eru misstórar og mismargar, fjöldi mynda breytilegur, mismunandi frágangur mynda í albúmi eða jafnvel á disk og svo mætti lengi telja.
   
• Það er mikilvægt að gera upp við sig hvort það henti ykkur að taka myndirnar fyrir eða eftir athöfnina. Það eru kostir og gallar við hvoru tveggja og ykkar að ákveða hvað hentar í ykkar tilfelli.
   
• Spyrjið ljósmyndarann hvort hann bóki margar tökur sama daginn, það er ekki gott að velja sér vinsælan og ofbókaðan ljósmyndara sem þarf svo kannski að flýta sér á stóra deginum.
   
• Hafið í huga hvort að ljósmyndirnar sem þið hafið séð eftir viðkomandi eldist vel. Svokallaðar tískumyndatökur hafa verið að ryðja sér til rúms á undanförnum árum en helsti galli þeirra er að þær eldast svo misvel.
   

Ég gerði um daginn góða uppgötvun er ég fór með dætur mínar í myndatöku, ég fann ljósmyndara sem uppfyllti öll mín skilyrði, var þægileg og sveigjanleg og sem umfram allt tók alveg frábærar myndir. Hún heitir Harpa Hrund og nam í Lundi í Svíþjóð og í Iðnskólanum. Hér er linkur á sýnishorn eftir hana: http://www.harpahrund.is/. Ég get heilshugar mælt með henni.

Tengt efni:

Skreytt fyrir brúðkaup