Pastasnúrur - hversu svalt er það !
|
Það var fyrir nokkru síðan að ég eignaðist formlega nýtt
áhugamál. Ég hafði um skeið haft augastað á pasta-gerðarvél
nokkurri sem ég hafði grunaða um að eiga eftir að fullkomna mína
kokka græjusælu, ef svo má að orði komast. Ég var búin að spá og
spekúlera, heimsækja nokkrar mismunandi búðir, gefa þeim hýrt auga
hérlendis sem erlendis og bera saman verð og gæði. Ég komst að því
að undirstöðugræjan var sú sama allsstaðar, það voru bara
útfærslurnar sem voru mismunandi. Það var t.d. hægt að fá sér
mótor við þær, ravíóli mót, deigskál með mótor sem hnoðaði pasta
deigið sjálf og svo mætti lengi telja. Það var svo vinkona mín
sem færði mér eina svona undursamlega maskínu að gjöf dag nokkurn
um haust og það er óþarfi að taka það fram að þetta var ást við
fyrstu sýn. Mín heittelskaða er ítölsk og gengur undir nafninu
IMPERIA. Það dróst nú reyndar á langinn að með okkur tækjust náin
kynni en fyrsta skiptið olli mér ekki vonbrigðum. Það er eitthvað
alveg sérstakt við það hvernig maður blandar eggjunum létt
saman við hveitið, vinnur þessi tvö element saman í eina sæng og
hnoðar svo af krafti þar til......ja bara þar til að maður hefur
fengið leið á þessu hnoði. Og eins og þetta sé ekki nóg þá er
heimagert ferskt pasta alveg himneskt á bragðið, létt, bragðmikið
og auðvitað passlega " al dente". Hvílið deigið í ísskáp nokkra
stund og fylgið svo leiðbeiningunum sem fylgja með vélinni.
Raunin er sú að þessi pastagerð hefur svo þróast í
fyrirtaks fjölskylduskemmtun. Hvað uppskriftir varðar hefur
þessi reynst mér best: pastadeig
Útbúa má hvaða magn sem er af pasta með því að nota hlutföllin 1
egg á móti 90 g af hveiti og smá saltklípa með. Auðveldasta magnið
fyrir byrjendur er tveggja til þriggja eggja blanda. Meira magn er
best að hræra, hnoða og fletja í skömmtum. Svo er bara að láta
ímyndunaraflið leika lausum hala; tagliatelle, ravioli, lasagna,
canneloni, tortelini og svo mætti halda áfram endalaust.
Litað pasta er gert á eftirfarandi hátt:
Bleikt: örlitlu af rauðbeðusafa er bætt út deigið.
Grænt: Fínt söxuðu soðnu spínati er bætt í deigið.
Orange: 2 msk af tómatpúrru er bætt út í deigið.
|
