Litirnir í þetta herbergi voru valdir með það fyrir augum að geta bæði hentað stelpum og strákum.

Það þarf ekki alltaf að kaupa sérhannað skiptiborð til að fá fína skiptiaðstöðu í barnaherbergið. Hér var keypt venjuleg lútuð furukommóða og henni breytt á ýmsa vegu.

Fyrst var neðsta skúffan söguð af til að fá rétta hæð á skiptiaðstöðuna. Fæturnir voru skrúfaðir af í sama tilgangi og einnig til þess að breyta útliti kommóðunnar. Svo voru höldurnar teknar af og kommóðan lökkuð. Nýjar höldur voru settar á og skiptidýnu komið fyrir ofan á.

Til að fá fallegar tunnur undir bleiur og óhreint tau voru tvær ómeðhöndlaðar járnruslatunnur úr IKEA  grunnaðar og svo lakkaðar með sama lakki og kommóðan. Lokin eru járnbakkar sem fengu sömu meðferð og höldur í stíl við kommóðuna voru settar á bakkana .

Skrautkantur er  svo málaður efst á tunnurnar í bláu, hvítu og gulu.

Fyrir ofan skiptiaðstöðuna á kommóðunni hengdum við litla skúffur úr IKEA sem málaðar voru í stíl við allt hitt. Svo voru tréstafir límdir á frontinn til skrauts. Í þessum hirslum er gott að geyma allt frá hitamælum og skartgripum til skæra og áburðar.

Statíf undir eldhúsrúllur var fest á vegginn og notaður undir pokarúllu svo alltaf væri hægt að teygja sig í poka undir bleijurnar og nota til þess aðra hendina, hinum megin við var komið fyrir snagarekka.

Létt himnasæng er yfir rúminu og var hún búin til úr gardínukappa og tjulli.

Eins og sjá má er "þema" herbergisins Bangsar. Þeir birtast í ýmsum myndum hér og þar um herbergið en þess þó gætt að þeir væru ekki fastir á neinu eða málaðir svo að auðvelt væri að skipta um þema þegar barnið stækkar án þess að þurfa að gera róttækar breytingar eða taka upp málningarfötuna.

Bangsar voru notaðir til að útbúa óróa fyrir ofan rúmið og þeim var einnig tyllt í gluggann og á bekk fyrir neðan hann. Þessi bekkur er einnig leikfangakista og á hann það sameiginlegt með kommóðunni að hafa einu sinni verið úr lútaðri furu.

Bangsamyndir voru hengdar upp í ramma og hann festur á vegginn með borða og slaufu. Til að ekki sjáist í naglann á veggnum límdum við fallega tölu á naglhausinn og notuðum til þess að límbyssu.

Þetta herbergi hefur svo fengið að vaxa með eigandanum í 6 ár og á þeim tíma gengið í gegn um margar smávægilegar breytingar þó að það hafi í aðalatriðum fengið að halda sér. Ef maður á hinn bóginn velur sér þekktar fígúrur í þema er erfiðara gera breytingar án þess að þurfa að skipta öllu út. Börnin fá líka oft frekar leið á svoleiðis myndum og að t.d. bangsímon hafi verið voðalega krúttlegt þegar barnið var eins árs er ekki eins víst að það sé jafn ánægt með bangsímon herbergið sitt þegar það er 5 ára.

tengt efni:

• Grunnar bókahillur
• Myndir hengdar upp með borðum
• Áhrif ljóss á liti
• Leiðir til að stílisera heimilið
• Að hengja upp myndir