|
Þegar elsta dóttir mín fæddist var ég uppfull af feminískum
draumórum um hvernig uppeldinu skildi háttað. Það skildi passað
uppá það að barninu yrði ekki þröngvað í eitthvert
fyrirframgefið félagslegt mót og staðalímyndum kynjanna sagt
stríð á hendur. Ég var dugleg að klæða hana í ljósbláan fatnað
til jafns við rauðan og bleiki liturinn var á bannsvæði. Öll
leikföng urðu að vera "kynlaus" þannig að hvorki bílar né dúkkur
voru vel séðar. Nema þá í jöfnum hlutföllum auðvitað. En
þetta einkastríð mitt við staðal ímyndir kynjanna bar ekki
árangur því að dóttir mín hreinlega fæddist með glingurgen og er
glysgjörn með afbrigðum. Hún elskar allt sem er bleikt. Hún er
jafnvel ennþá veikari fyrir öllu sem glitrar. Hin fullkomna
uppgjöf átti sér því stað þegar kom að því að innrétta herbergið
hennar. Við byrjuðum á að finna búningasafninu hennar góðan
stað í bleikum kistli og á snögum sem málaðir voru bleikir.
Spegill fékk sama lit og á hann hengdum við bleikar ljósaseríur.
Við fengum Tinnu Bjarnadóttur til að mála ballerínu á vegginn
fyrir okkur og svo skreyttum við búninginn hennar og kórónuna
með "gimsteinum" sem límdir voru á vegginn.
Eins og maður getur ímyndað sér er hér um dramadrottningu að
ræða og breyttum við því gestasófanum í leiksvið, Tinna málaði
málaði bæinn bleikan fyrir ofan sófann og er þessi bær í
hlutverki sviðsmyndar við hinar ýmsu uppfærslur. Tjaldið sem
hægt er að draga frá og fyrir leiksviðið er sturtuhengi, bæði
ódýrt og svo nægjanlega létt til þess að falla ekki niður.
Genin létu ekki að sér hæða og þrátt fyrir ítrekaðar
tilraunir mínar til að leiðrétta þetta val náttúrunnar undi
litla daman sér hvergi betur en við skúringar og önnur
eldhússtörf. Það var því ekki um annað að ræða en að smíða handa
henni litla útgáfu af eldhúsi sem hún gat dundað sér í.
Vaskurinn er stálskál sem er felld niður í MDF plötuna. Reyndar
er allt þetta smíðað úr MDF nema skúffueiningin sem er felld inn
í miðju skápinn, hana fengum við í IKEA. Eldavélin hefur
skápahöldur í stað takka og handfangs og ofnhurðin er
einfaldlega máluð á. Í "ofninum" er svo góð hirsla undir hvað
sem maður kýs. Eins og sjá má er þetta svo allt saman málað
fagurbleikt og fjólublátt þó svo mér hafi með lagni tekist að
sannfæra hana um að hvíti liturinn væri bestur í aðalhlutverkið.
Eftir enn eina ferðina í IKEA komum við heim með borð og tvo
stóla sem einnig fengu meðferð með málningarpenslinum í stíl við
allt hitt. Miðja borðsins fékk þó aðeins öðru vísi meðhöndlum en
ég átti dós af krítartöflumálningu sem ég notaði á borðplötuna
og málaði svo kant með bleikum lit. Mottan undir borðinu er með
áprentuðum parís sem hefur slegið í gegn.
Til þess að auka enn á prinsessuáhrifin er hægt að útbúa
svona höfðagafl á rúmið úr MDF plötum. Enn sem fyrr en bleikt og
fjólublátt í aðalhlutverki ásamt smávegis gyllingu.
tengt efni:
•
Myndir hengdar upp með borðum
•
Áhrif ljóss á liti
•
Leiðir til að stílisera heimilið
•
Að hengja upp myndir
|
