minnisatriði

Viku áður: sendu út boðskortin, prentaðu út matseðlana, keyptu servíettur og kerti og gerðu þér ferð í ÁTVR. Einnig er gott að klára gjafirnar snemma.
4 dögum áður: Farðu í búð og verslaðu það sem þolir smá geymslu. Ákveddu hvernig skreytingar þú ætlar að nota og viðaðu að þér efni.
2 dögum áður: Verslaðu í matinn það sem á vantar og kauptu blómin. Legðu á borð og kláraðu skreytingarnar.
Daginn áður: Eldaðu kjúklinginn og kældu, settu saman allt sem þarf í laxaquiche, pylsubökuna og french toast og geymdu yfir nótt, bakaðu svo réttina rétt áður en gestirnir koma. Bakaðu skonsurnar og súkkulaðikökuna og búðu til hindberjacoulis. Láttu renna af AB mjólkinni svo hún sé tilbúin. Villisveppina er einnig hægt að undirbúa fyrirfram og setja í skinkubollana.
Samdægurs: Settu quiche, böku, french toast, rösti kartöflurnar og skinkubollana í ofninn. Blandaðu saman salatinu og kjúklingnum ,settu AB mjólkina í glös og þeyttu rjómann.

mynstur og margbreytileiki
Ég valdi rauðan lit til þess að lífga uppá borðið að þessu sinni  því hann er svo kvenlegur og smellpassaði tilefninu. Ég notaði einlitar rauðar servíettur og braut þær í morgunverðarbrot sem þjónar því hlutverki að vera vasi fyrir hnífapörin. Rauðar rósir voru í aðalhlutverki í borðskreytingunum, ég klippti stilkana stutta og notaði sellófan til þess að fylla upp í vasana og styðja við rósirnar. Rauð kertaglös og hvít kubbakerti settu punktinn yfir i-ið.

möguleikar
• Ef þú vilt ekki skera ávexti niður í ávaxtasalat er eins gott að setja fallega og þroskaða ávexti eins og t.d. vínber, apríkósur og plómur í skál ofan á klaka og sjá til þess að gestirnir hafi lítinn hníf til þess að skera ávextina niður sjálfir.

• Til þess að spara tíma er hægt að kaupa rösti kartöflurnar frostnar og stinga þeim svo í ofninn með hinum réttunum til upphitunar.

minningar
Til minningar um daginn og sem þakklætisvott til handa gestunum mínum, útbjó ég litla pakka  sem innihéldu Hýjasintulauk og miða með áletruninni: Ræktið í nafni vináttu, velmegunar og góðra verka. Ég keypti litla rauða kassa í IKEA, klippti niður kreppappír í ræmur sem ég setti svo laukinn ofaná í kössunum. Pakkaði inn með fleiri ræmum og skreytti með miðunum sem ég hafði útbúið til að nota á vasana og kertin. Mög fljótlegt og einfalt.

mússík
Tónlistin sem spiluð er við svona tækifæri er vandmeðfarin, hún verður að vera þægileg en ekki yfirgnæfandi en má heldur ekki falla í þá gryfju að flokkast sem lyftutónlist. Við þetta tilefni dugði ekkert annað en Ella Fitzgerald undir borðum, bandarísk, léttdjössuð og klassísk. En þar sem þetta var konuboð og testosteróninu var svo auðsjáanlega áfátt spilaði ég "swing" tónlist með þekktum kyntáknum eins og  Rod Stewart, Robbie Williams eða hinum eilífa Cole Porter