lagt á borð f. páska

Hér er ég með dekkað páskaborð fyrir 12 manns. Þegar svona margir eru til borðs við venjulegt borðstofuborð mega skreytingarnar ekki vera stórar og viðamiklar svo vel fari um gestina við borðið og ekki virðist vera of þröngt um hvern og einn. Undirdiska, mörg glös og mikið af hnífapörum ætti maður geyma þegar svona margir eru til borðs og matseðillinn verður að taka mið af því.

Þessa litríku miða með nafni hvers og eins útbjó ég í tölvunni og klippti svo til. Þeir lífga mikið uppá annars látlaust borð og hvítt stell.

Þegar plássið er lítið er þarf  að bregða útaf vananum og finna nýstárlegar lausnir. Hér er borðskreytingin hengd upp svo hún taki ekki pláss á borðinu og sitt hvoru megin við hana voru grannir kertastjakar með gulum kertum og kertahringjum. Nægt rými var þá eftir fyrir matarfötin.

Servíetturnar braut ég saman á mjög einfaldan hátt og lagði undir hnífapörin. Bæði dúkurinn og servíetturnar eru í skrautlegri kantinum til að vega upp á móti annars látlausum og fáum skreytingum.

Lítill páskaungi við disk hvers og eins var svo eins og punkturinn yfir i-ið.