Jólaborðið (2)

Hér gefur að líta nokkrar hugmyndir af borðskreytingum fyrir jólin. Mér finnst það alltaf auka á hátíðleikann að setjast niður við kræsingar með fjölskyldunni ef borðið er fallega skreytt .

Þetta stell er það fallegt og íburðarmikið að það skreytir sig eiginlega sjálft, gyllingin í stellinu er færð út á dúkinn með gylltu perlu og skrautsteinabandi úr vír sem hægt er að forma að vild.

Stemmningin yfir þessari dekkingu er frekar áramótaleg þar sem fjaðrir minna á skrautgos úr flugeldum og svart-hvíta litaþemað ýtir undir glamúrinn sem við notum oft frekar í tengslum við áramót en jólin. Uppstilling hnífapara og skála einnig frekar óhefðbundin. Það er um að gera að leika sér aðeins og taka hlutina ekki of hátíðlega.

Hér er notast við ákaflega hefðbundinn jólaefnivið sem er epli, greinar og könglar. Ákaflega skandinavískt, gamaldags og rómantískt. Þetta hæfir einnig stellinu mjög vel en það er það fyrsta sem þarf að huga að áður en að borðskreytingin er ákveðin. Rauður löber er svo lagður þvert á hvítan borðdúk til þess að brjóta hvíta litinn aðeins upp og rauðar tauservíettur setja svo punktinn yfir i-ið.

Gyllt, silfur og brons hefur verið mjög áberandi undanfarið og eins og hér sést þarf ekki mikið af glimmeri til þess að skapa hátíðarstemmningu við þetta borð. Stellið er í sjálfu sér mjög einfalt og í raun hversdagslegt en brúnu rendurnar í því tengjast þessu bronslita í skrautinu og brúntónaða glasinu og saman myndar þetta fallega heild. Gaman er að leika sér með glösin og hafa jafnvel 2 til 3 gerðir/liti við hvern disk.

Aftur erum við hér með afskaplega hverdagslegt stell sem þarf eitthvað mjög upplífgandi til þess að verða að einhverju sérstöku. Til að ná fram þessum áhrifum valdi ég doppótta diskamottu og servíettur í stíl og reyndi að ná fram smá hæð á dekkinguna með bollanum. Smart að bera fram léttfreyðandi súpu í kaffibolla á undan forréttinum eða færa hann einfaldlega til hliðar þegar maturinn er borinn á borð og þá er hann tilbúinn fyrir kaffi eftir matinn.

Þessi borðskreyting er áreynslulaus og minimalísk en fjólublái liturinn var notaður til þess að ná fram sterkum áhrifum og lyfta stellinu frá dúknum svo þau renni ekki saman í eitt. Silfraðar jólakúlur og silfurlituð glimmer fiðrildi gera þetta svo nægjanlega jólalegt án þess að maður fari út fyrir ramma naumhyggjunnar.

Grænt er og verður litur jólana ásamt rauðu auðvitað og því verða allar grænar eða rauðar borðskreytingar jólalegar algjörlega áreynslulaust. Notið nokkra mismunandi litatóna af sama litnum til þess að dekkingin verði ekki leiðigjörn og einhæf. Lífrænt form diskana gefur tilefni til þess að leika sér með uppröðun þeirra og hnífapörunum er stillt upp á óhefðbundinn hátt.