minnisatriði

3 Vikum áður: skoðaðu dúkana þína og tauservíetturnar og ákveddu hvað á að nota,sendu þetta í þvotthús eða þvoðu og straujaðu sjálf. Fyrir þá sem vilja nota tauservíettur bendi ég á að í stórmörkuðum eru til spreybrúsar með sterkju sem notuð er til að stífa servíetturnar. Sjálfri finnst mér það ómissandi að hafa stífaðar tauservíettur á hátíðarborðinu.
Viku áður:  Ákveddu hvernig skreytingar þú ætlar að nota og viðaðu að þér efni. Kauptu servíettur og allt annað sem geymist vel. (allt annað en fersk blóm)
Daginn áður: Samkvæmt öllu ætti nú að vera komin þorláksmessa, leggðu nú á borðið í rólegheitum og reyndu að gera úr þessu notalega stund. Renndu létt yfir dúkinn með straujárni til að ná úr honum skápakrumpunum. Restin kemur svo í þeirri röð sem þér hentar.
Samdægurs: Ef ætlunin var að nota lifandi blóm gengur þú frá skreytingunni samdægurs svo hún hafi ekki látið á sjá um nóttina. Epli, ávextir og grænmeti þola samt alveg að standa sólarhringinn ef skreytingin krefst þess ekki að þau séu skorin niður í sneiðar eða báta.

mynstur og margbreytileiki
Að þessu sinni valdi ég lime grænt, hvítt og silfrað sem aðallitina. Hvítur dúkur var lagður fyrstur á borðið en þar ofan á setti ég gardínu sem ég fann í IKEA og gerði mikið fyrir borðið. Aðalatriðið var svo borðskreyting sem samanstóð af blómaskreytingu, eplum og kertum. Glös á grænum fæti og græn glös undir forréttinn halda svo græna litnum enn frekar á lofti. Hvítt kemur svo inn í stellinu, servíettunum og dúknum. Silfur undirdiskar ásamt hnífapörum sjá svo um að lyfta borðinu enn frekar.

möguleikar
Það er um að gera að blanda saman ólíkum efnum og hlutum því það myndar oft skemmtilegar andstæður – verið óhrædd við að láta hugmyndaflugið ráða og skapa ykkar stíl á borðið. Notið hefðbundna hluti á óhefðbundinn hátt og reynið að nota það sem þið eigið fyrir og blanda því saman við eitthvað nýtt.

minningar
Fallega skreytt jólaborð gerir mikið fyrir hátíðlegan kvöldverð þegar fjölskyldan sest niður og slakar á saman og setur í rauninni punktinn yfir i-ið. Gott ráð er að gefa sér tíma á þorláksmessu nú eða að morgni aðfangadags til þess að skreyta borðið.  Upplagt er að gera hefð úr þessu og leyfa börnunum að vera með og taka þátt í þessu skemmtilega verkefni, þetta getur orðið jafnmikil fjölskylduskemmtun og að skreyta jólatréð og séð ykkur fyrir skemmtilegum jólaminningum í framtíðinni.

Ein hugmyndin er að leyfa börnunum að föndra skraut við hvern disk, útbúa nafnspjöld  eða að kenna þeim fallegt servíettubrot.

matarmenning
Aðfangadagskvöld og maturinn tengdur því er oft á tíðum eitthvað sem fólk er með niðurnjörvað og gerir eins ár eftir ár, notar uppskriftirnar hennar ömmu, hefðirnar hennar mömmu og lagið hans pabba við að skera jólasteikina. Það er allt gott og blessað og bara gaman að halda í svona hefðir en tilbreyting getur þá falist í borðskreytingunum.

Tengt efni:

blönduð brúðarskreyting

skreytt f. brúðkaup

kertaskreyting