|
barnaafmæli f. 45
Krílið mitt hún Stella Maren (alias Crouci d´ou la)
varð eins árs um daginn og af því tilefni var að sjálfsögðu
haldin herjarinnar veisla. Mikið rosalega er gaman að skipuleggja
barnaafmæli; maður getur virkilega tapað sér í allskonar krúttlegum
smáatriðum og pastel litum og skreytingum með tilheyrandi tuskudýrum.
Ég ákvað að hafa hefðbundna kökuveislu að þessu sinni því að einhverra
hluta vegna býð ég sjaldan upp á svoleiðis herlegheit og vel yfirleitt
aðrar leiðir. Það var sem sagt kominn tími á almennilega kökuveislu
með öllu. Það var von á allri fjölskyldunni og því miðast allar tölur
við 45 manna veislu en að sjálfsögðu er hægt að sníða það á alla
kanta.
matseðill
kökuhlaðborð
poppyseed kaka með sítrónukremi
samloka
með kjúklingasalati
samloka
með egg og beikonsalati
kókosmuffins með kremi
súkkulaði, sulta og
frostungur
skyrterta m. kiwi
skúffukaka afmælisbarnsins
marengsterta með súkkulaðirúsínum og
salthnetum
ostabakki með kexi og
perucider jelly
Poppkorn og sælgæti
drykkir
heitt
hvítt súkkulaði
kakó með marshmallows
minnisatriði
Viku áður: sendu út boðskortin, keyptu servíettur og
annað þematengt, gott er að vera búin að ganga frá gjöf
afmælisbarnsins svo að það verði ekki stress á síðustu stundu.
4 dögum áður: Verslaðu inn það sem þolir geymslu. Byrjaðu að
baka marengsinn. Muffins er hægt að baka og setja í frysti, sömuleiðis
botnana.
2 dögum áður: Útbúðu skyrtertuna og það sem eftir var af öðrum
botnum.
Daginn áður: Gerðu salötin og geymdu í kæli. Allar kökurnar
þola það að vera settar saman daginn áður og geta því verið tilbúnar.
Leggðu dúkana á borðin og sléttaðu þá samkvæmt
húsráði.
Samdægurs: Skreyttu kökurnar, leggðu á borð og undirbúðu
drykkina. Það þarf að skreyta borðið, blása í blöðrur og setja
sælgæti í skálar. Smurðu samlokurnar og taktu ostana úr ískápnum að
minnsta kosti 2 tímum áður en að veislan hefst.
mynstur og margbreytileiki
Ég fékk rosalega sætar gamaldags bangsímon servíettur í
Partýbúðinni, þar keypti ég líka bangsímon borðann og hattana. Þegar
svona teiknimynda-þema er valið skal varast að ofgera því ekki, fáir
hlutir gera meira heldur en ef allt er eins, diskar, glös, dúkur osfrv.
Þá nýtur þetta sín ekki og hafa ber í huga að minna er meira í þessu
tilfelli. Ég átti ljósgrænan dúk sem var fallegur við og svo var
nammið í Bangsímon litunum, grænt, gult og hvítt. Kökurnar voru það
líka sem og drykkirnir.
möguleikar
• Til að flýta fyrir má kaupa marengsinn og svampbotninn tilbúinn.
Einnig væri hægt að nýta sér þjónustu osta og smjörsölunnar og kaupa
tilbúna ostatertu í stað skyrtertunnar.
Annar möguleiki í stöðunni er að fá
vinkonu eða ættingja til þess að létta undir með þér og baka eina eða
tvær kökur. Mamma fékk t.d. það verkefni að búa til skyrtertuna enda
er hún snillingur í þeim.
minningar
Það háttar þannig til hjá mér að ég legg hlaðborðið yfirleitt á
vinnuborð í bókherbergi / skrifstofu sem ég hef aðstöðu í inn af
stofunni. Það þýðir að ég sit uppi með tölvuskjáinn á vinnuborðinu því
að það er svo mikið mál að taka hann niður. Ég hef tíðkað að breyta
þessum stóra mínus í stóran plús með því að búa til myndaseríur sem
passa tilefninu, í þessu tilfelli fyrsta ár barnsins í
hnotskurn, og svo læt ég seríuna rúlla stöðugt á meðan að gestirnir
stoppa. Reyndar er skjárinn flatur þannig að auðveldara er að koma
þessu við.
mússík
Við þessi tækifæri þýðir lítið að velta sér mikið upp úr mússíkvali
því að eftir sem gestum og ég tala nú ekki um börnum, fjölgar, verður
hávaðinn meiri. Til að byrja með hafði ég nýju íslensku vísnaplötuna
á geislanum og lét hana bara ganga til enda. Svo hreyfði ég ekki
við tónlistinni meira þannig daginn.
|
